Rom 4 | MYW | STEP | Bitaninuways tabuds ven watinow, yagan Ebelam. Ama̱wan bitalivans?

Romans 4

Liva̱nen Ebelam

1 Bitaninuways tabuds ven watinow, yagan Ebelam. Ama̱wan bitalivans?

2 Kukin Ebelam ansinap didumwal peinan nawotet bwein, kadiloka bikaypom ansinap; tage nag kadilok bikayapam wamatan Yowbad, nag.

3 Aveiyag Bukitab nilivan? Ilana:

“Ebelam isimounid Yowbad waseg, mapuna idoki tadidumwal.”
4 Kukin bitawotet, maysad nag mamagina siwa̱youb, nag; maysan dawotet.

5 Kukin nag bitawotet, misinaka tasimounid waseg towen takidumwa̱lun dakalbaleb ya̱kid, mo bidokeid tadidumwal ya̱kid.

6 Ma̱wan-vak Deibid anilivan bwanabwein wasigeis gamag kalisiy nag iwotets va̱gan Yowbad bikidumwa̱lus, ilana:

7 “Bweina kumwa̱saws yakamiy peinan bo inumlev amisinap kalbaleb, bo iwid.
Kumwa̱saws peinan daGuyaws nag binuway amisinap kalbaleb.”
9 Tabta ilivan ma̱wan misinaka min-Yudiy bimwa̱saws peinan Yowbad biwid asisinap kalbaleb, o adok vena babaw gimgilis. E, taninuways.

“Ebelam isimounid Yowbad waseg mo idoki tadidumwal.”
10 Avei-tut waseg mo nidoki tadidumwal? Misumkwey nivag nakabivatus? Nag. Idoki tadidumwal, bweilim mwasanin ikous mo Yowbad isek nakabivatus.

11 Kweiboug nag ivag nakabivatus, tage isimounid Yowbad waseg, mo idok tadidumwal; wankuyeim mo isek nakabivatus, mamagina naman mulin towen, peinan bo idok tadidumwal. Takinew bitakow Ebelam nakabivatus, o takinew nag bitakow, deisa tasimounid waseg Yeisuw, mo Yowbad bidokeids tadidumwals o bitamlavags Ebelam tibun ya̱kids, takinew tobwag ven gimgilis yakamiy, o takinew min-Yudiy yakamey. Yakamey Ebelam nakabivatus wawom nises. Magat bakasimounid mo bakamlavag Ebelam tibun mounid. Kukin gog nag, bo nag. Peinan kweiboug Ebelam nag ivag nakabivatus, isimounid mo Yowbad idoki tadidumwal towen.

Bitasimounid Yowbad waseg mo bitalivet youd bwanabwein

13 Yowbad bo ilivnek Ebelam siney tibun igaw bikawes ven babaw watinow, sikiyay tasiyas. Nag iba̱nes sikiyay towen peinan ikanawes Moses nakaleiwag, nag. Deisa isimounids waseg Yowbad, to nidoki tadidumwals tasiyas, mo iba̱nes sikiyay towen.

14 Ama̱wan bitaban dakiyays? Bitakanow Moses nakaleiwag, o adok bitasimounid Yowbad anilivan to nilivnek? Adok bitasimounid-wan. Tasiyas idokes bikanawes Moses nakaleiwag mo biba̱nes, nag gog; tasiyas bo ibwabwes simounid waseg Yowbad anilivan to nilivnek.

15 Moses nakaleiwag nitasiplev mapuna Yowbad bikawkuneid. Magat kaleiwag nag, nag beivag adsinap kalbaleb.

16 Tasimounids mo bitaba̱nes youd towen bwanabwein. Yowbad bo ilivnek youd towen bisekeids peinan nasiwa̱youb avakaein wasigeis ya̱kids. Ebelam delen mounid bikawes. Tasiyas takanaweins Moses nakaleiwag mwasanin sisiyas ya̱kids, peinan tasimounids ma̱wana Ebelam nisimounid waseg Yowbad; mamagina Ebelam tabuds babaw ya̱kids. Liva̱nen Ebelam nises mamagina,

“Bo akatigikeim ven babaw tibus ya̱koum.”
Youd towen Yowbad nilivnek bo bisek Ebelam delen, peinan bo isimounid wamatan Yowbad, taykitun takanigs; mtowen bidibek aveiyag makaw, bilana, “Kusap,” mo bisap.

18 Innamis va̱gan biban natun. Innamis-wan ee... bo itovek, igaw-wan innamis, peinan isimounid mo bimlavag tibus ven babaw, peinan Yowbad anilivan mamagina:

“Deleim igaw mo bibabaw.”
19 Ininuway ee... ikakin wa̱won, ilana, “Bo atovek; kakita bakanig. Agbweilim bo imlavag lakatutan.” E, inuway nakwav Sela peinan vinakal; tage nag igwey, isimounid-wan waseg Yowbad.

20 Nag ipiyev simounid, peinan iysiyous Yowbad anilivan waseg; tage iya̱kawn waseg Yowbad mo nasimounid itawtoun.

21 Singay isimounid, ikakina Yowbad ikadilok biwtel ma̱wana nilivnek.

22 Isimounid waseg Yowbad mapuna mo idok tadidumwal towen.

23 Livan towen “Idok tadidumwal towen” nag ilel peinan Ebelam anmwa̱net tadidumwal. Ya̱kids-vak peinads. Igaw bitasimounid waseg Yowbad to nivag daGuyaws Yeisuw ikit kanig waseg, mo bidokeid tadidumwal ya̱kids.

25 Bo iweiys Yeisuw adsinaps kalbaleb peinan, ivag mo ikit va̱gan kid mo bikidumwa̱lud.